Олон улсад танигдсан Худалдаа, хөгжлийн банкийг дэлхий дахинд үнэлсэн томоохон шагналууд үргэлжилсээр, “Монгол улсын худалдааны санхүүжилтийн шилдэг банк”-аар 3 жил дараалан шалгаруулж, 2013 оны шагналыг мөн хүртлээ.

Энэхүү хүндтэй шагнал гардуулах үйл ажиллагааг дэлхийн худалдааны санхүүжилтийн чиг хандлагыг тодорхойлогч GTR нэрээр алдаршсан Global trade review (Дэлхийн худалдааны тойм) сэтгүүлээс жил бүр зохион байгуулдаг бөгөөд хамгийн шударга шалгаруулалтаар буюу бусад улс орон бүрийн банк, санхүүгийн байгууллагуудын дунд санал асуулга явуулан шилдгээ тодруулдаг юм.

Монголбанкнаас гаргасан 2012 оны судалгаагаар Монголын арилжааны 7-н банк Худалдааны санхүүжилтийн үйлчилгээг хүргэж байгаагаас 50 гаруй хувийг нь  Худалдаа, хөгжлийн банк дангаараа эзлэж байна. Байгуулагдсан цагаасаа буюу 1990 оноос эхлэн худалдааны санхүүжилтийн бүтээгдэхүүн үйлчилгээг харилцагчиддаа хүргэж ирсэн ХХБ энэ салбарт өндөр туршлага, найдвартай байдлаараа ялгардаг юм.  

2012 оны эцсийн байдлаар ХХБ-нд дэлхийн 34 банк 290 гаруй сая ам.долларын гадаад худалдааны санхүүжилтийн зээл баталж өгсөн билээ. Уг зээлийн санхүүжилтийг дэлхийн аль ч улсаас гадаад худалдаа хийхдээ ашиглаж болдгоороо давуу талтай байгаа нь Монголын гадаад худалдааны бизнес эрхлэгчдийн хувьд томоохон дэмжлэг болж байна.