Энэ оны 8 дугаар сарын 24-ний өдөр Макао дахь Four Season зочид буудалд Азийн санхүүгийн шилдэг сэтгүүл болох Finance Asia сэтгүүлээс зохион байгуулсан улс орны банк санхүүгийн сектор дахь шилдгүүдийг шалгаруулах шагнал гардуулах ёслолын үйл ажиллагаа болж өнгөрлөө.

Уг арга хэмжээний хүрээнд анх удаагаа Монголын банкуудын дунд сүүлийн 3 жил судалгаа хийн Монголын шилдгийн шилдэг банкийг шалгаруулан, шагнал гардуулсан нь энэ удаагийн онцлог үйл явдал боллоо. Энэхүү шалгаруулалтыг хийхдээ тухайн банкны олон улс дахь хүлээн зөвшөөрөгдөх байдал, нэр хүнд, үйл ажилагааны цар хүрээ, санхүүгийн чадавхи зэргийг харгалзан үзсэн  бөгөөд энэ жилийн “Монголын шилдэг банк”-аар ХУДАЛДАА, ХӨГЖЛИЙН БАНК шалгарлаа.

Олон улсад банк, санхүүгийн чиглэлээр мэргэшсэн, нэр хүнд бүхий Finance Asia сэтгүүл нь сүүлийн 10 гаруй жил уг арга хэмжээг зохион байгуулж байгаа бөгөөд тухайн банкны санхүүгийн чухал үзүүлэлтүүд болох активын өгөөж, өөрийн хөрөнгийн өгөөж зэрэг ашигт ажиллагааны үзүүлэлтүүд болон зээлийн багцын чанар гэх мэт үзүүлэлтүүдэд судалгаа хийн шалгаруулалтыг бодит үр дүнд тулгуурлан хийдгээрээ бусад шагналаас онцлог байдаг.

Худалдаа, хөгжлийн банк нь энэ 2012 гарсаар олон улсад танигдсан томоохон сэтгүүлүүдээс хоёр дахь удаагаа нэр хүндтэй шагнал авч буй нь энэ юм. Энэ нь Худалдаа, хөгжлийн банкны санхүүгийн чадавхи дэлхийн хэмжээнд хүлээн зөвшөөрөгдөж байгаагийн илрэл юм.