Худалдаа, хөгжлийн банк “Монгол Улсын Шилдэг Банк”-аар тодорлоо
Азийн банк, санхүү болон хөрөнгө оруулагчдын тэргүүлэх сэтгүүл болох “FinanceAsia” нь 20-н жилийн ойн баярын хүрээндээ Platinum Awards буюу санхүүгийн салбарын шилдгүүдийг шалгаруулах ёслолын арга хэмжээ 2016 оны 10-р сарын 13-ны өдөр Хонгконг хотноо зохион байгууллагдаж Худалдаа, хөгжлийн банк зах зээлдээ тэргүүлэгчээр өргөмжлөгдөн “Монгол Улсын Шилдэг Банк” шагналыг хүртлээ. Энэхүү шагналын эздийг тодруулахдаа сүүлийн 20-н жилийн санхүүгийн үзүүлэлтүүдийг үндэслэсэн байна.
FinanceAsia нь 1996 оноос эхлэн HSBC, Goldman Sachs, Citi зэрэг Азийн болон дэлхийн шилдэг банк, санхүүгийн байгууллагуудтай хамтран ажиллаж, Ази-Номхон Далайн бүсийн банк, санхүүгийн салбарын хамгийн шинэлэг үйл явдлын мэдээ, мэдээллийг олон нийтэд болон хөрөнгө оруулагчдад хүргэдэг, нэр хүндтэй сэтгүүл юм.
Худалдаа, хөгжлийн банк нь энэхүү нэр хүндтэй сэтгүүлээс 2012 онд “Монгол Улсын Шилдэг Банк”, 2013 онд “Хөгжиж буй орнуудын Шилдэг Банк”, мөн 2015 онд “Азийн Шилдэг Корпорацийн Бонд” зэрэг хүндтэй шагналуудыг тус тус хүртсэн билээ.
Худалдаа, хөгжлийн банк нь 2016 оны III улирлын байдлаар банкны зах зээлийн нийт зээлийн 26.6%, нийт активын 27.9%-ийг тус тус бүрдүүлж, Монгол улсын гадаад худалдааны 58.2%-ийг дангаараа гүйцэтгэсэн байна.
Азийн хөгжлийн банкны Худалдааны санхүүжилтийг дэмжих хөтөлбөрийн “Шилдэг банк”-аар тодорлоо
Худалдаа, хөгжлийн банк (ХХБанк) нь 2016 оны 9 дүгээр сарын 7-ны өдөр Сингапур хотноо зохиогдсон GTR Asia Trade and Treasury Week 2016 арга хэмжээний үеэр Азийн хөгжлийн банкны худалдааны санхүүжилтийг дэмжих хөтөлбөрийн шилдэг банкаар шалгарч, “Leading Partner bank in Mongolia" буюу “Монгол дахь тэргүүлэх хамтрагч банк” шагналыг гардан авлаа.
ХХБанк нь 2005 оноос эхлэн олон улсын худалдааны санхүүжилтийг дэмжих хөтөлбөрүүдэд идэвхтэй хамрагдаж ирсэн билээ. Түүнчлэн 2010 оны 3-р сард хөгжиж буй орнуудын гадаад худалдааг дэмжин, санхүүжилт олгодог, Азийн хөгжлийн банкны Trade Finance Program (TFP) буюу Худалдааны санхүүжилтийг дэмжих хөтөлбөрт элсэн орсон юм. 2009 оноос хойш нийт 8200 гаруй харилцагч байгууллагуудад 23.6 тэрбум ам.долларын худалдааны санхүүжилтийг олгожээ.
2015 онд Монгол улсын гадаад худалдааны төлбөр тооцооны 77.9%-ийг ХХБанк дангаараа гүйцэтгэж, гадаад төлбөр тооцооны хамгийн өргөн сүлжээ, бэлтгэгдсэн шилдэг боловсон хүчин, олон улсын банк санхүүгийн байгууллагуудтай тогтоосон бизнес хамтын ажиллагаагаараа Монгол улсын банк, санхүүгийн салбартаа тэргүүлэгч гэдгээ дахин нотлон харуулсан билээ.
МОНГОЛ УЛСЫН ШИЛДЭГ АРИЛЖААНЫ БАНКААР 5 ДАХЬ ЖИЛДЭЭ ШАЛГАРЛАА
Их Британийн “Global banking & finance review” буюу “Олон улсын банк санхүүгийн тойм” байгууллагаас жил бүр шалгаруулдаг дэлхийн банк, санхүүгийн салбарын шилдгүүд тодорч, Худалдаа, хөгжлийн банк 2016 оны “Монгол улсын шилдэг арилжааны банк”-аар 5 дахь жилдээ дахин шалгарлаа.
Global banking & finance review awards нь дэлхийн өнцөг булан бүрт байгаа банк, санхүүгийн байгууллагуудын дунд байнгын тасралтгүй судалгаа шинжилгээг явуулж, даяаршсан нийгмийн тив бүрд адил тэгш үйлчлэхийг зорьдог онцлог, нэр хүндтэй шалгаруулалт юм.
2012 онд энэхүү шалгаруулалтаас ХХБанк “Монгол улсын шилдэг байгууллагын банк”, 2013, 2014, 2015 онуудад “Монгол улсын шилдэг арилжааны банк” шагналуудыг хүртэж байсан бол 2016 онд амжилтаа бататгаж, Монгол Улсын тэргүүлэгч банк гэдгээ дахин нотоллоо.
Монголдоо төдийгүй дэлхийд амжилтаараа үнэлэгдэж буй ХХБанкны харилцагчид, хамтран ажиллагсад Та бүхэндээ талархал илэрхийлье.
“АЗИЙН ШИЛДЭГ КОРПОРАЦИЙН БОНД” ШАГНАЛЫГ ГАРДЛАА
Азийн санхүүгийн мэдээллийг мэргэжлийн түвшинд дэлхий даяар түгээдэг Finance Asia сэтгүүлээс Худалдаа, хөгжлийн банкны 2015 онд олон улсын зах зээлд арилжаалсан дунд хугацаат 500 сая ам.долларын бондыг “Азийн шилдэг корпорацийн бонд”-оор шалгарууллаа. Finance Asia сэтгүүлийн тус шалгаруулалт нь Ази тив төдийгүй дэлхий нийтийн банк санхүүгийн салбарынхны анхаарлын төвд байдаг билээ. Монгол улсын арилжааны банкнаас гаргасан бонд ийнхүү “Азийн шилдэг корпорацийн бонд”-оор шалгарч чадсан нь улсынхаа нэр хүндийг өндөрт өргөсөн явдал боллоо.
ХХБанкны 500 сая ам.долларын бонд нь Монгол улсад итгэх гадны хөрөнгө оруулагчдын итгэлийг дахин сэргээсэн алхам болсон бөгөөд бондын 90%-ийг дэлхийн нэр хүндтэй хөрөнгийн удирдлагын компаниуд, 5%-ийг дэлхийн томоохон банкууд, үлдсэн 5%-ийг санхүүгийн байгууллагууд бүрдүүлсэн юм.
ХХБанк нь олон улсад бонд амжилттай гаргасан Монголын хамгийн анхны аж ахуйн нэгж, арилжааны банк бөгөөд энэхүү бонд нь 2007, 2010, 2012 онуудад гаргасан бонд болон 2014 онд Монгол улсаас анх удаа оффшор юанийн бондыг амжилттай арилжаалснаас хойшхи олон улсын хөрөнгийн зах зээлд гаргаж буй 5 дахь удаагийн бондын арилжаа юм.
Дэлхийд амжилтаараа үнэлэгдэж буй ХХБанкны харилцагчид, хамтран ажиллагсад Та бүхэндээ талархал илэрхийлье.
Хөгжил дэвшилд хамтдаа