Байгаль орчин, нийгэмд ээлтэй бизнесийн үйл ажиллагаа эрхлэж, байгаль орчин, нийгэмд үзүүлэх сөрөг нөлөөллийг бууруулах, түүнээс сэргийлэх замаар урт хугацаанд тогтвортой хөгжих нь дэлхийн улс орнуудын тогтвортой хөгжлийн чухал зорилт болоод байна. Энэхүү чиглэлийн хүрээнд байгалийн нөөцийг зүй зохистой ашиглах, нөхөн сэргээх, хөдөлмөрийн аюулгүй байдал, эрүүл ахуйг хангах, нийгмийн бүхий л давхаргад санхүүгийн үйлчилгээг хүртээмжтэй байлгах, компаниудын нийгмийн хариуцлагыг дээшлүүлэх гээд олон асуудал багтаж байна.

Дэлхийн хөгжингүй орнуудын туршлагаас харахад дээрхи зорилтод хүрэхэд банк, санхүүгийн салбар чухал үүрэгтэй оролцдог байна. Учир нь банк нь харилцагчиддаа олгох санхүүжилтээрээ дамжуулан, зээлийн эрсдэлийг үнэлэх, бууруулах үйл явцтай адил зарчмаар харилцагчдынхаа байгаль орчин, нийгэмд учирч болзошгүй эрсдэлийг тодорхойлж, үнэлэх улмаар тэдгээр эрсдэлээс үүсч болох санхүүгийн хор хохирлоос харилцагчийг хамгаалах, нийгмийн хариуцлагаа хэрэгжүүлэх чиглэлээр хамтран ажилладаг юм.

Цаашлаад банк нь үйл ажиллагаа, бүтээгдэхүүн, үйлчилгээний хүрээнд жендерийн эрх тэгш байдлыг хангаж ажиллах зорилгын хүрээнд эмэгтэйчүүд, эрэгтэйчүүдийн үр дүнтэй оролцоог дэмжиж, жендерийн хяналт шинжилгээ, үнэлгээний үйл ажиллагаагаар байгууллага,  тэдгээрт олгох банкны санхүүжилтийг жендерийн мэдрэмжээр үнэлэх, зөвлөгөө өгөх, загвар боловсруулах замаар жендерийн эрх тэгш байдлыг дэмжихэд хувь нэмэр оруулна.

Дэлгэрэнгүйг харилцагчийн гарын авлагаас ЭНД дарж үзнэ үү

ХХБанкны Байгаль орчин, нийгмийн хариуцлагын бодлого

ХХБанкны Уур амьсгалын санхүүжилттэй төсөл, хөтөлбөрийн байгаль орчин, нийгмийн эрсдэлийн удирдлагын заавар

ХХБанкны Жендэрийн эрх тэгш байдлын бодлого

ХХБ нь Нидерландын хөгжлийн банктай хамтран 2012 оноос Байгаль орчин, нийгмийн хариуцлагын бодлого, зээлдэгчийн байгаль орчин, нийгмийн эрсдэлийн түвшинг үнэлэх үнэлгээний сүүлийн үеийн арга аргачлал, эрсдэл ба хяналтын тогтолцооноос бүрдсэн байгаль орчин, нийгмийн эрсдэлийн удирдлагын цогц системийг Монголдоо нэвтрүүлээд ажиллаж байна.

Энэхүү систем нь хэрэглээний зориулалттай зээлээс бусад бизнесийн зориулалттай зээлийн хүсэлтэнд хамаарах ба бизнес эрхлэгч таны байгаль орчин, нийгмийн эрсдэлийг бид тодорхойлж, таньтай хамтран уг эрсдэлээс сэргийлнэ.

ХХБанк нь ОУ-ын гэрээ, конвенц, ОУСК-ийн гүйцэтгэлийн стандарт болон МУ-ын хууль тогтоомжоор хориглосон үйл ажиллагааг санхүүжүүлэхгүй бөгөөд тэдгээр үйл ажиллагаагаар “Хориотой үйл ажиллагааны жагсаалт” гаргасан.

“Хориотой үйл ажиллагааны жагсаалт”-д ороогүй үйл ажиллагааг санхүүжүүлэх зээлийн хүсэлтийн хувьд зээлдэгчийн үндсэн үйл ажиллагаа болон зээлийн зориулалтаас хамааран эрсдэлийн түвшин тогтоогдох ба ногоон, шар, улаан гэсэн 3 түвшинд ангилагдаж, үнэлгээ хийгддэг.

Үнэлгээндээ тулгуурлан, шаардлагатай тохиолдолд эрсдэлийг бууруулахад авах арга хэмжээнүүдийн талаар зээлдэгчдэд зөвлөгөө өгч, зээлийн гэрээнд нэмэлт нөхцөл болгон оруулдаг.

Зээлийн гэрээний нэмэлт нөхцлүүдийн биелэлтийг зээлийн хугацаанд эргэн хянадаг. Дараах схемээс эрсдэл тодорхойлох, буруулах, хамгаалах, хянах системийг харна уу.

Хориотой үйл ажиллагааны жагсаалт” буюу ямар төрлийн бизнест бид зээл олгохгүй вэ?

• Биологийн төрөл зүйлийн нөөц болон соёлын өвийн хамааралтай тухайн орны хууль тогтоомж болон олон улсын конвенциор хориглосон аливаа үйлдэл;
• Олон улсад хориглосон буюу тухайн орны хууль тогтоомж, олон улсын конвенциор хууль бус гэж үзэгддэг үйл ажиллагаа, үйлдвэрлэл худалдаа;
• Ховордсон ургамал амьтанг олон улсын хэмжээнд худалдаалах тухай конвенцид багтах зэрлэг амьтны болон ургамлын аймгийг худалдаалах;
• Байлдааны, зэр зэвсгийн худалдаа, бүтээгдэхүүн;
• Согтууруулах ундааны үйлдвэрлэл, худалдаа (пиво, дарснаас бусад);
• Тамхины үйлдвэрлэл, худалдаа;
• Мөрийтэй тоглоом, казино болон түүнтэй адилтгах байгууллагууд;
• Садар самуун явдал, биеэ үнэлэхийг дэмжсэн аливаа бизнес;
• Цацраг идэвхит бодисын материал үйлдвэрлэл, худалдаа;
• Албадан хөдөлмөрлөлт, хор хөнөөлтэй хүүхдийн хөдөлмөрийн мөлжлөг ашиглан үйлдвэрлэсэн бүтээгдэхүүн буюу үйл ажиллагаа
• Ойжуулалтын тогтвортой удирдлаган дор хөгжүүлж байгаа ой модоос бусад газарт мод болон бусад ойн гаралтай бүтээгдэхүүнийг үйлдвэрлэх буюу тэдгээрийг худалдаалах;
• Холбогдох экспорт, импорт болон транзит орнуудаас авсан шаардлагатай экспорт, импортын гэрчилгээгүй, эсхүл дамжин өнгөрүүлж тээвэрлэх зөвшөөрөлгүй барааг наймаалцах;

Эрсдэлийн түвшин нь үйл ажиллагааны төрөл, чиглэлээс хамаарч дараах байдлаар ангилагдана.
 

Нарийвчилсан үнэлгээ хийхэд зээлдэгчээс нэмэлт материал шаардаж болно. Үүнд:

• Мэргэжлийн хяналтын ерөнхий газар, эрх бүхий байгууллагын дүгнэлт; /ажлын байр, бүтээгдэхүүний чанар, гарал үүслийн гэрчилгээ, эрүүл ахуйн гэрчилгээ гэх мэт/
• Бүтээгдэхүүний тохирлын гэрчилгээ, стандартууд;
• Байгаль орчинд нөлөөлөх байдлын үнэлгээ, тайлан, төлөвлөгөө;
• Байгаль орчны бодлого;
• Хөдөлмөрийн аюулгүй байдал, эрүүл ахуйн журам, зааварчилгаа, төлөвлөгөө, яаралтай тусламжийн төлөвлөгөө;
• Компанийн нийгмийн хариуцлагын бодлого, үйл ажиллагааны төлөвлөгөө;
• Хөдөлмөрийн дотоод журам, хүний нөөцийн бодлого гэх мэт.

БОНХ-ын бодлогыг хэрэгжүүлснээр Банкинд, Харилцагч байгууллагад, Байгаль орчин, нийгэмд дараах давуу талууд бий болж байна.

Банкинд:

• ОУ-н шилдэг банкуудын туршлагыг МУ-д хэрэгжүүлэх;
• Зээлийн эрсдэл буурах;
• Байгаль орчин, нийгэмд учрах эрсдэлийг бууруулах, улмаар улс орны тогтвортой хөгжилд хувь нэмэр оруулах.

Харилцагчид:

• Төлөвлөөгүй зардал болон эрсдэлээс урьдчилан сэргийлэх. Тухайлбал:
  • Үйлдвэрлэлийн ослоос урьдчилан сэргийлэх, ослын тоо хэмжээг бууруулах улмаар ослоос үүдэн гарах зардал болон эрсдэлээс сэргийлэх;
  • Компаний олон нийтэд учруулж болзошгүй сөрөг нөлөөнөөс үүдсэн олон нийтийн эсэргүүцлээс гарч болох зардал болон эрсдэлээс сэргийлэх;
  • Зөвшөөрөгдөөгүй үйл ажиллагаа, чанарын шаардлага хангаагүй бүтээгдэхүүн, үйлчилгээ зэргээс үүдсэн төр, захиргааны байгууллагын торгууль, шийтгэлээс сэргийлэх;
• Ногоон технологи ашиглаж, эрчим хүч, түүхий эдээ хэмнэх замаар үйл ажиллагааны зардлаа бууруулах;
• Зохистой техник, технологи ашиглаж, хог хаягдлаа багасах, үйлдвэрлэлийн гарцыг нэмэгдүүлэх, ажилчдын ажиллах таатай орчныг бүрдүүлж ажлын бүтээмжийг нэмэгдүүлэх замаар орлого, ашгаа нэмэгдүүлэх;
• Хямд хүүтэй зээл, санхүүжилт авах боломжтой болох;
• Олон нийтэд танай компанийн нэр хүнд өсөх, улмаар эерэг сурталчилгаа болж орлого, ашиг нэмэгдэх;
• Улс орны тогтвортой хөгжилд хувь нэмрээ оруулах.

Байгаль орчин, нийгэмд:

• Ус, хөрс, агаарын бохирдол буурах;
• Цаг уурын өөрчлөлт багасах;
• Ховордсон ан амьтан, ургамлыг хамгаалах;
• Түүх, соёлын өвийг хамгаалах;
• Хүний эрх, эрх чөлөөг зөрчсөн асуудлууд багасах.

2022 он

• “Хязгааргүй мөрөөдөл” төслийн хүрээнд 2022 оны байдлаар нийт 53 ерөнхий боловсролын сургууль, их дээд сургууль, цэцэрлэгийн номын санг тохижуулж 180,000 гаруй хүүхэд, залуусын  боловсролд хувь нэмэр оруулж байна.
• УАНС-гийн Төлөөлөн Удирдах Зөвлөлөөр батлуулсан Монгол Улсад тогтвортой, ногоон санхүүжилтийг нэмэгдүүлэх Бэлэн байдлын хөтөлбөрийн төлөвлөгөөт ажлуудыг ТоС Холбоотой хамтран хэрэгжүүлэн ажиллаж байна. 
• Төв байр дотор “Green Hour” хэмээх гэрлээ унтраан эрчим хүчээ хэмнэх аяныг ажлын өдөр бүрийн 12:30 цагаас 13:30 цаг хүртэл хэрэгжүүлсэн хэвээрээ байна.   
• Цаасгүй, цахим технологид суурилсан “Их Наяд – Лайт” салбар үйл ажиллагаагаа эхлүүлсэн ба ингэснээр ХХБ-ны цахим үйлчилгээнүүдэд цаасан маягтаар бүртгүүлж байсныг цахим хэлбэрт бүрэн шилжүүллээ. Үүнээс гадна, банкны дотоод үйл ажиллагааг цахим системд шилжүүлэх замаар цаасны хэрэглээг бууруулж байна.
• Засгийн газрын 2019 оны 181 дүгээр тогтоолоор батлагдсан “Үүрэг хүлээсэн хэрэглэгчийг тодорхойлох, үүрэг хүлээсэн хэрэглэгчийн эрчим хүч хэмнэх хөтөлбөр, төлөвлөгөө, тэдгээрийг боловсруулах аргачлал, хэрэгжилтийг тайлагнах журам”-ын дагуу ХХБ нь өөрийн төв байр дээр эрчим хүчний аудитыг хийлгэсэн.
• УАНС-гийн итгэмжлэгдсэн байгууллагын хувьд ХХБ нь Монголын Улсын Ногоон таксономи дахь эрчим хүчний хэмнэлт, бага бохирдуулагч эрчим хүч, сэргээгдэх эрчим хүч, тогтвортой хөдөө аж ахуй болон тогтвортой ус, хаягдлын хэрэглээ, цэвэр тээвэр зэрэг ангиллуудыг хамрахуйц төсөл, хөтөлбөрүүдийн саналын баримт бичгийг боловсруулан ажиллаж байна. Тус ажлын хүрээнд бид гадаад болон дотоодын оролцогч талууд болон зөвлөхүүдтэй хамтын ажиллагаагаа өргөжүүлэв.
• ХХБ нь Тогтвортой хөгжлийн зорилтуудын хүрээнд нийт 1.12 их наяд төгрөгийн тогтвортой санхүүжилтийг олгов.  
• ХХБ нь Бизнесийн ногоон зээлийн бүтээгдэхүүнийг нэвтрүүлснээс хойш санхүүжүүлсэн төсөл, хөтөлбөрүүд нь жилдээ 47,833.92 тонн СО2 (нүүрсхүчлийн хий) хүлэмжийн хийн ялгарлыг бууруулахаар байна.
• Шотланд улсын Эдинбургийн Их Сургуулийн Бизнесийн сургуультай хамтран банкны Ногоон банк болох дунд хугацааны стратегийн зорилгыг хэрэгжүүлэхэд тулгарч болох бэрхшээлүүд болон тэдгээрийн шийдлийг тодорхойлох судалгааны ажил дээр хамтран ажиллав.
•  Шамбала Инженерийн Суурин ХХК-аас  бизнес эрхлэгчдийг хүлэмжийн хийн ялгарлыг бууруулах технологи, үйлдвэрлэл, үйл ажиллагаанд уриалах зорилгоор зохион байгуулсан  "Go Zero" арга хэмжээг дэмжиж ажиллаа

2021 он

• ХХБ нь Төв байр дотор “Green Hour” хэмээх гэрлээ унтрааж эрчим хүчээ хэмнэх аяныг ажлын өдөр бүрийн 12:30 цагаас 13:30 цаг хүртэл хэрэгжүүлсээр байна.
• Банкандаа хаягдал зай хураагуур болон хуванцар савны зориулалтын хогийн сав байршуулан хог хаягдлыг ангилан ялгах үйл ажиллагааг хэрэгжүүлж байна. Хуримтлагдсан аюултай хог хаягдлыг “Монголын Хог хаягдлыг дахин боловсруулах үндэсний холбоо” болон “Цэнгэг усны нөөц, байгаль хамгаалах төв”-д тус тус хүргүүлдэг.
• ХХБ нь тогтвортой, ногоон хөгжлийг хангах болон нийгмийн хөгжлийн шинж чанартай эх үүсвэрийг татах, зээл олголтын чиглэл, хамрах хүрээ, тавигдах шаардлага, үр дүн, хяналт, тайлагналтын зарчмыг тодорхойлох зорилго бүхий “Тогтвортой санхүүжилтийн хүрээ” баримт бичгийг Монгол Улсдаа анхлан боловсруулан гаргаж, Moody’s корпорацийн хараат компани V.E /Vigeo Eiris/-аар тус хүрээг Ногоон бондын зарчим, Нийгмийн бондын зарчим болон Тогтвортой хөгжлийн бондын удирдамжтай нийцэж байгаа эсэх дээр хөндлөнгийн үнэлгээг гаргуулан “Тогтвортой” гэсэн үнэлгээг аваад байна.
• Анхны “Ногоон санхүүжилтийн форум”-ыг НҮБ-ын Хөгжлийн хөтөлбөр, Монголбанк болон бусад харилцагч, хамтран ажиллагч байгууллагуудын оролцоотойгоор амжилттай зохион байгуулав.
• Олон улсын банк болох стратегийн зорилгын хүрээнд даян дэлхийн Тогтвортой хөгжлийн зорилгыг хэрэгжүүлэх, ногоон банк болох зорилтуудыг тодорхойлж, тэдгээрийн биелэлтийг хангахад чиглэсэн “Тогтвортой санхүүжилтийн дотоод хөтөлбөр”-ийг санаачлан эхлүүллээ.
• БОАЖЯ-аас зохион байгуулсан “Хүлэмжийн хийн тооцоолуур”-ыг боловсруулах ажилд ТоС холбоотой хамтран хөгжүүлэлтэд туслалцаа үзүүлж ажиллаа.
• Монгол Улсад тогтвортой, ногоон санхүүжилтийн хэрэгжилтийг нэмэгдүүлэх Бэлэн байдлын хөтөлбөрийг УАНС-гийн Төлөөлөн Удирдах Зөвлөлөөр батлуулав.
• 2021 оны 8 дугаар сараас эхлэн Бизнесийн ногоон зээлийн бүтээгдэхүүнийг зах зээлд нэвтрүүлсэн ба тус бүтээгдэхүүнээр дамжуулан томоохон аж ахуй нэгж, байгууллагуудын одоогийн “хүрэн” бизнес загварыг байгаль орчинд ээлтэй модель руу шилжүүлэхэд дэмжлэг үзүүлж ажиллаж байна.
• ХХБ нь Эмэгтэй бизнес эрхлэгчдийг дэмжих зээл (ЭБЭДЗ)-ийн бүтээгдэхүүнийг 2021 оны 10 дугаар сараас эхлэн харилцагчдадаа санал болгож эхэллээ. Тус бүтээгдэхүүн нь эмэгтэй хувьцаа эзэмшигчид давамгайлсан, эмэгтэй гүйцэтгэх удирдлагатай  эсвэл эмэгтэй ажилтнууд давамгайлсан бизнес, аж ахуйн нэгжүүдэд таатай нөхцөл бүхий санхүүжилтийг олгох замаар жижиг, дунд үйлдвэрлэлийг дэмжихийн зэрэгцээ жендерийн эрх тэгш байдлыг хангахад хувь нэмрээ оруулах зорилготой юм.
• Жендерийн хороогоо шинэчлэн байгуулж, байгууллагын бүхий л түвшинд Жендерийн эрх тэгш байдлын бодлогын хэрэгжилтийг ханган ажиллаж байна
• ХХБ-ны Жендерийн хорооны харьяа сайн дурын “Жендер Нетворкинг Клуб”-ыг үүсгэн байгуулж жендерийн эрх тэгш байдлын талаарх мэдлэг, мэдээллийг банкны бүх түвшний ажилтнуудад түгээх зорилготойгоор үйл ажиллагаагаа явуулж байна

2020 он

• НҮБ-ын Уур амьсгалын ногоон сан (“УАНС”)-ийн Монгол Улс дахь итгэмжлэгдсэн байгууллага болов. Ингэснээр ХХБ нь уур амьсгалын өөрчлөлтийг сааруулах болон/эсвэл уур амьсгалын өөрчлөлтөд дасан зохицох чиглэлийн үндэсний хэмжээний томоохон төсөл, хөтөлбөр тус бүрд тус сангаас олон улсын хөгжлийн банк, санхүүгийн байгууллагууд болон бусад тогтвортой, ногоон хөгжлийг дэмжсэн сангуудтай хамтран 50-250 сая ам.долларын хөнгөлөлттэй санхүүжилтийг татах боломжийг бүрдүүллээ.
• 2020 оноос Банк шинэ зохион байгуулалтын бүтэцтэй ажиллаж эхэлсэн бөгөөд тус ажлын хүрээнд Олон улсын банкны газрын харьяа Ногоон санхүүжилтийн алба (“НСА”)-ыг байгууллаа. НСА нь Тус алба нь тогтвортой, ногоон болоод уур амьсгалын санхүүжилтийн эх үүсвэр татах, хамтын ажиллагааг хөгжүүлэх, төсөл, хөтөлбөрийг санхүүжүүлэх, ногоон зээлийн бүтээгдэхүүн үйлчилгээг бизнесийн сегмент бүр дээр хөгжүүлэх, мөн ногоон санхүүжилтийн талаарх мэдлэг, ойлголт, мэдээллийг түгээн дэлгэрүүлэх зорилготойгоор ажиллаж байна.
• ХХБ нь дунд хугацааны стратегийн зорилгын хүрээнд Жендэрийн эрх тэгш байдлын бодлогоо Монгол Улсын хууль тогтоомж, олон улсын тэргүүн туршлага дээр үндэслэн 2020 оны 09 сарын 17-нд шинэчлэн баталж, өдөр тутмын үйл ажиллагаа, засаглалын түвшинд мөрдөн ажиллаж байна. Жендэрийн эрх тэгш байдлын бодлогыг банкны бүх шатны удирдлага, менежер, салбар, тооцооны төвийн ажилтнууд, харилцагч, түнш байгууллагууд дагаж мөрдсөнөөр эмэгтэйчүүд, эрэгтэйчүүдийн үр дүнтэй оролцоог дэмжиж, жендэрийн мэдрэмжээр нийгмийн бүхий л бүлэгт хүртээмжтэй хүрч ажиллах юм.
• ХХБ нь “Хязгааргүй мөрөөдөл” төслийн хүрээнд 3 сургуулийн 17,481 сурагчдад хүрч ажилласан. Ингэхдээ хэрэгцээт номын багц, номын тавиурыг хүлээлгэн өгөх арга хэмжээг зохион байгуулж ажиллалаа.
• Иргэдэд зориулсан хэрэглээний ногоон зээлийн бүтээгдэхүүнийг өөрсдийн эх үүсвэрээр зах зээлд нэвтрүүлж эхэлснээр харилцагчдын байгаль орчинд ээлтэй бүтээгдэхүүн, үйлчилгээний  худалдан авалтыг дэмжиж харилцагч иргэдийн байгальд ээлтэй амьдралын хэв маягийг бий болгоход түлхэц болов.
• Их Британи, Умард Ирландын Нэгдсэн Вант Улсын Эдинбургийн их сургуультай хамтран банкны тогтвортой, ногоон зээлийн бүтээгдэхүүнийг хөгжүүлэх чиглэлээр хамтын ажиллагааг эхлүүлэв.
• НҮБ-ын Тогтвортой хөгжлийн зорилт (ТХЗ)-уудаас Банк нь 4 зорилтыг сонгон Банкны дунд хугацааны стратегийн зорилгод шигтгэн тусгав. Үүнд: ТХЗ#4. Чанартай боловсролыг дэмжих, ТХЗ#5. Жендерийн эрх тэгш байдлыг хангах, ТХЗ#8. Зохистой хөдөлмөр эрхлэлт ба эдийн засгийн өсөлтийг дэмжих, ТХЗ#13. Уур амьсгалын өөрчлөлтийн үр нөлөөг багасгах зэрэг зорилтууд орсон.

2019 он

• ХХБанк нь төв байрнаас гарч буй хуванцар хог хаягдлуудыг ангилан ялгах савнуудыг давхар бүрт байршуулан хуванцар ус, ундааны савнуудыг ангилан ялгаж эхэллээ.
• ХХБанк нь хаягдал зайнаас үүдэн бий болох сөрөг нөлөөлөл, хөрс, усны бохирдлыг бууруулах зорилгоор төв байрны газар нэгжүүд болон төв салбартаа хаягдал зайг ялган хаях хураагууртай боллоо.
• ХХБанк нь Төв байрны газар нэгжүүдэд Green Hour өдөр бүр 12:30 цагаас 13:30 цаг хүртэл гэрлээ унтрааж эрчим хүчээ хэмнэх аяныг эхлүүлэв. Уг аяны хүрээнд гэрлийн унтраалгууд дээр сануулах хуудсуудыг байршуулав.
• ХХБанкны ажилтнууд дунд хүүхдийн хөгжлийг дэмжиж, тэгш хүртээмжтэй байдлыг хангах үүднээс номын хандивын аян өрнүүлж 20 хайрцаг буюу 900 гаруй ном цуглуулан Чингэлтэй дүүргийн Долоон буудалд шинээр байгуулсан Beyond Book номын сан болон нийгмийн эмзэг бүлгийн хүүхдүүд, өсвөр үеийнхэнд хүрч ажилладаг Кристина Нобелын хүүхдийн сангийн дэргэд шинээр байгуулагдсан номын клубт хандивлалаа.
• 2019 оны 5-р сарын 29-ний өдөр Бүгд Найрамдах Киргиз Улсын “Бай-Тушум” банкны төлөөллүүд ХХБанканд хүрэлцэн ирж, Байгаль орчин, нийгмийн эрсдэлийн менежментийн системтэй танилцаж, Тогтвортой санхүүжилт хөтөлбөрийн хэрэгжилтийн талаар туршлага судаллаа.
• ХХБанк 2019 оны 3-р сард Бүс ба Зам санаачилгын Ногоон хөрөнгө оруулалтын зарчмуудын гишүүнээр нэгдэж, 2019 оны 8-р сарын 15-17-ны өдрүүдэд зохион байгуулагдсан Ногоон хөрөнгө оруулалтын зарчмуудын гишүүн байгууллагуудын анхны уулзалтад оролцов. Уг уулзалтаар тус зарчмын ажлын хэсгүүд болон “Байгаль орчин, уур амьсгалын эрсдэлийн үнэлгээ” болон “Ногоон санхүүгийн бүтээгдэхүүний инновац” ажлын хэсгүүдэд элсэв.
• ХХБанкны хамт олон 2019 оны 6-р сарын 8-ны өдөр Төв аймгийн Эрдэнэ сумын мод үржүүлгийн талбайд очин нийт 6,000 гаруй моддыг “Миний клуб” ТББ-тай хамтран услан арчилж цэвэр цэмцгэр ногоон ирээдүйн төлөө 5 дахь жилдээ нэгдлээ.
• ХХБ нь салбартаа анхдагч, бусдадаа үлгэрлэгч байхыг зорьдог бөгөөд үүнийхээ хүрээнд 2019 оны 10-р сарын 15-ны өдөр Сэргээгдэх эрчим хүч үйлдвэрлэгчдийн холбоонд гишүүнээр элсэж анхны гишүүн банк боллоо.
• ХХБанк нь 2019 оны 12-р сарын 5-ны өдөр Монголбанк, Монголын Тогтвортой санхүүжилт (ТоС)-ийн холбоо хамтран зохион байгуулсан “Шилдэг ТоС Банк” уралдаанд ТоС-ийн хэрэгжилт, Байгаль орчин, нийгмийн эрсдэлийн удирдлагын систем, ТоС-ийн дэмжлэгийн тогтолцоо, ТоС оффис гэсэн шалгуур үзүүлэлтүүдэд нийлбэр дүнгээр 1 дүгээрт шалгарч “Шилдэг ТоС Банк”-аар 3 дахь удаагаа шалгарлаа.

2018 он

• Худалдаа, хөгжлийн банк 2018 оны ТоС манлайлагч банкаар шалгаран 2018 оны 12-р сарын 10-нд “Тогтвортой Санхүүжилт” олон улсын форумыг ТоС холбоотой хамтран амжилттай зохион байгууллаа.
• Худалдаа, хөгжлийн банк нь хөгжлийн бэрхшээлтэй иргэд, зорилтот бүлгийн ахмад настнуудад зориулсан асрамжийн үйлчилгээ, түр байрлуулах болон сэргээн засах үйлчилгээ үзүүлдэг, сайн дурын халамжийн үйл ажиллагааг явуулдаг “Ачлалт Хүүхдүүд” ТББ-д өөрийн асрамжийн байртай болоход нь дэмжлэг үзүүлж, 350 сая төгрөгийн санхүүжилтийг олголоо. Мөн энэхүү сайн үйлийг дэмжиж Худалдаа, хөгжлийн банкны нийт ажилтнууд өөрсдийн санаачилгаар нийт 20.0 сая төгрөгийн сэтгэлийн хандив цуглуулан гардууллаа.
• Камбожийн Вант Улсын банк, санхүүгийн байгууллагуудын төлөөлөл нь Монгол улсын банк, санхүүгийн системд амжилттай хэрэгжиж буй Тогтвортой санхүүжилт хөтөлбөрийн талаар туршлага судлахаар ХХБанкaнд хүрэлцэн ирж Байгаль орчин нийгмийн эрсдэлийн менежментийн системийн талаар туршлага судаллаа. Уг уулзалтаар ХХБанкны байгаль орчин, нийгмийн эрсдэлийн менежментийн бодлого, журам, үнэлгээний арга аргачлал болон харилцагчийн үйл ажиллагаанаас нийгэм болон байгаль орчинд учруулж болзошгүй эрсдэлийг хэрхэн үнэлж, удирдан, бууруулдаг сайн туршлагуудыг хуваалцлаа.
• ХХБ-ны хамт олон  “My club” ТББ-аас жил бүр уламжлал болгон хэрэгжүүлдэг “Мод тарих, услах” аянд 4 дэх жилдээ оролцлоо. Банкны хамт олон цөлжилт ихээр явагдаж байгаа Төв аймгийн Аргалантын сумын нутагт 8’000 гаруй мод усаллаа.
• ХХБ нь “Бид Банкир” аяны хүрээнд Монгол улсын их сургууль болон Санхүү эдийн засгийн их сургууль дээр нээлттэй өдөрлөг зохион байгуулж Тогтвортой санхүүжилт хөтөлбөрийн тухай танилцуулга семинарыг зохион байгууллаа.

2017 он

• Монголын Банкны Холбооноос банкны системийн хэмжээнд үлгэр жишээ болохуйц Байгаль орчин, нийгмийн эрсдэлийн менежментийн системийг бий болгосон, ТоС-ын зарчмуудыг амжилттай хэрэгжүүлэн,  өндөр ач холбогдол бүхий олон ажлуудыг санаачлан хэрэгжүүлж, манлайлан ажилласныг үнэлж “Шилдэг ТоС Банк”-аар 2 дахь удаагаа шалгарууллаа.
• Зээлдэгчийн байгаль орчин, нийгмийн эрсдэлийг үнэлж, бууруулах арга хэмжээ авч ажиллалаа. Зээлдэгчид холбогдох нөхцөл шаардлагыг тавьж, хэрэгжилтийг хянаж ажилласан ба эдгээр нөхцөл, шаардлагын хэрэгжилт 75%-тай биелсэн байна.
• Тайлант онд Нидерландын хөгжлийн банк болон дотоодын байгаль орчны зөвлөх компани Эс И Си ХХК-аар Байгаль орчин, нийгмийн эрсдэлийн менежментийн системдээ 2 дахь удаагаа хөндлөнгийн аудит хийлгэж, 90.04 хувь буюу “Сайн” үнэлгээ авлаа.
• “МАЛЧДАД ТУСЛАХ САЙН САНААНЫ АЯН”-ыг дэмжиж Худалдаа, хөгжлийн банкны нийт хамт олон хандивын үйл ажиллагааны хүрээнд 821 ширхэг бод, бог малын нэмнээ, 1050 ширхэг төлийн уут, лаа, шүдэнз, бээлий зэрэг өргөн хэрэглээний бараа болон 400 гаруй боодол өвс,  50 орчим шуудай хивэг зэрэг нийт 10 гаруй сая төгрөгийн тусламжийн барааг малчдад хүргүүллээ.
• ХХБ-ны хамт олон  “My club” ТББ-аас жил бүр уламжлал болгон хэрэгжүүлдэг “Мод тарих, услах” аянд 3 дахь жилдээ оролцлоо. Банкны хамт олон энэ удаад цөлжилт ихээр явагдаж байгаа Төв аймгийн Аргалантын сумын нутагт 8’000 гаруй мод усаллаа.
• Байгаль орчинд ээлтэй, эдийн засгийн хэмнэлттэй ногоон ажлын байр бий болгох зорилго бүхий “GREEN OFFICE” төслийн уралдааныг зохион байгууллаа. Шилдгээр шалгарсан төслүүдийг 2018 онд үйл ажиллагаандаа  хэрэгжүүлэхээр зорин ажиллаж байна. 
• Туул голын сав газрын захиргаатай хамтран “Туул голын сав газрыг цэвэрлэх байгаль орчинд ээлтэй үйл ажиллагаа”-г  хоёр дахь жилдээ амжилттай зохион байгуулж, ХХБанкны 400 гаруй ажилтан Туул голын дагуу нийт 6 км газраас 900 орчим шуудай хог хаягдлыг цэвэрлэлээ.
• Онцгой байдлын ерөнхий газарт ХХБанкны ажилтнуудын зүгээс авран хамгаалах ажиллагаанд зориулж 10 сая төгрөгийн үнэ бүхий иж бүрэн 4 монгол гэр гардуулан өглөө.

2016 он

• ТоС хөтөлбөрийн хүрээнд “My club” ТББ-тай хамтран “Ногоон ирээдүй” мод услах ажилд ХХБанкны 200 гаруй ажилтнууд сайн дурын хандив цуглуулахаас гадна Төв аймгийн Эрдэнэ сумын нутагт 8’500 мод усаллаа.
• ХХБанк нь зээлийн үйл ажиллагаагаа шат дараатай автоматжуулан, цаасны хэрэглээг бууруулж зээлийн үйл ажиллагаагаа “НОГООН” болголоо. Энэхүү ажлын хүрээнд 198 ширхэг мод, 392 тонн ус, 22 тонн нүүрс хүчлийн хий, 16 тонн хог хаягдал бий болохоос сэргийлж чадлаа.
• Монголын Банкны Холбооноос ХХБанкийг 2016 оны “Шилдэг ТоС Банк”-аар шалгарууллаа.
• Туул голын сав газрын захиргаатай хамтран ХХБанкны 450 гаруй ажилтан Туул голын дагуу нийт 9 км газрыг 880 гаруй шуудай хог хаягдлаас цэвэрлэлээ.

2015 он

• ТоС-ийн бодлогын хүрээнд ХХБ-ны ажилтнууд дотоодын болон, олон улсын сургалтуудад тогтмол хамрагдлаа.
• Тогтвортой Санхүүжилт хөтөлбөрийн 8 зарчим, 4 салбарын удирдамжийн хүрээнд банк нь өөрийн байгаль орчин, нийгмийн эрсдэлийн бодлого, журам, зааврууддаа өөрчлөлт оруулж, ТоС хөтөлбөрийн хүрээнд харилцагчдад тавигдах тусгай шаардлагуудыг бодлого заавартаа тусгалаа.
• Хөгжлийн бэрхшээлтэй иргэн, жирэмсэн болон өндөр настнууддаа банкны бүх салбараар дараалал харгалзахгүй үйлчилдэг боллоо.
• Дорнод, Хэнтий, Сүхбаатар аймгуудад гарсан гал түймрийн гамшигт өртсөн 109 айл өрхөд тусламжийн гараа сунган, нийт 10,000,000 төгрөгийг хандивласан.
• Харааны бэрхшээлтэй иргэн, өндөр настан, бичиг үсэггүй иргэдэд банкны үйлчилгээг хүртээмжтэй хүргэх зорилгоор АТМ-уудыг бий болгож, мөн www.tdbm.mn вэб хуудсаа дээрх иргэдэд нээлттэй болгов.
• Банкны Төв байр болон шинээр нээж буй бүх салбарууддаа тэргэнцэртэй иргэдэд зориулсан зам, гарц, зогсоолыг бий болгосоор байна.
• Салбар, тооцооны төвүүдийн ажилтнууд санаачилгаар Өмнөговь, Дорноговь, Дархан-Уул аймаг болон цөлжилт ихээр явагдаж байгаа Багануур дүүрэгт My Club-тай хамтран мод тарьж, байгаль дэлхийгээ хамгаалах ажилд хувь нэмрээ орууллаа.
• Зээл хариуцсан ажилтнуудаа байгаль орчин, нийгмийн эрсдэлийн менежментийн чиглэлийн чадавхжуулах сургалт, семинаруудад тогтмол хамруулахад онцгой анхаарч ажиллалаа.

2014 он

• ТоС-ийн бодлогын хүрээнд ХХБ-ны ажилтнууд дотоодын болон, олон улсын сургалтуудад тогтмол хамрагдлаа.
• Олон улсын туршлагатай дотоодын Байгаль орчны зөвлөх байгууллагуудтай хамтран ажиллаж байна.
• ЭЗ-ийн салбар бүрийн хувьд БОНХ-ын эрсдэлүүдийг тодорхойлж, түүнийг бууруулах, хянахад чиглэгдсэн баримт бичгийн жагсаалт, зээлийн ажилтны гарын авлага болон БОНХ-ын нөхцөл шаардлагуудыг шинэчлэн боловсруулав.
• БОНХ-ын бодлогыг сурталчлан таниулах, БОНХ-ын сургалт, ОУ-ын туршлагын талаар нийт ажилтнуудын мэдлэгийг дээшлүүлэх зорилгоор дотоод вебд ТоС-ийн булан нээн ажиллуулж байна.
• Эрсдэлийг нарийн тодорхойлохын тулд эдийн засгийн салбарын кодчиллыг нарийвчилсан ба БОНХ-ын эрсдэлийн ангиллыг шинэчилсэн.
• Цаашид ХХБ нь Тогтвортой санхүүжилтийн менежментийн системээ тогтмол хөгжүүлэн сайжруулж, олон улсын тэргүүн туршлагуудыг хэрэгжүүлэн, харилцагч таныг эрсдэлээс хамгаалж, эдийн засгийн тогтвортой хөгжлийг дэмжин, ирээдүй хойч үедээ эрүүл орчныг өвлүүлэхээр ажиллах болно.

2013 он

• БОНХ-ын бодлогын хэрэгжилтэд PwC-р ОУ-н хөндлөнгийн аудит хийлгэлээ.
• Нидерландийн хөгжлийн банк болон Монголын Банкны холбоотой хамтран Монгол улсад анх удаа “МУ-ын Тогтвортой Санхүүжилтийн форум”-ыг зохион байгуулсан.
• Монгол Улсын нийгэм, байгаль орчинд ээлтэй ТоС-ийн бодлогыг дэмжин хөгжүүлэх тунхаг бичигт гарын үсэг зурсан.

2012 он

• ХХБ-ны Байгаль орчин, нийгмийн хариуцлагын удирдлагын системийг боловсруулах ажлыг эхэллээ.
• Зээлийн ажилтнууд болон байгаль орчин, нийгмийн эрсдэлийн шинжээч нарыг сургаж, мэргэшүүллээ.
• PwC ОУ-н зөвлөх компаний дэмжлэгтэйгээр байгаль Орчин, Нийгмийн хариуцлагын бодлого, заавар, журмууд, зээлдэгчийн байгаль орчин, нийгмийн эрсдэлийн түвшинг үнэлэх үнэлгээний сүүлийн үеийн арга аргачлал, эрсдэл ба хяналтын тогтолцооноос бүрдсэн байгаль орчин, нийгмийн эрсдэлийн удирдлагын цогц системийг бий болгож албан ёсоор хэрэгжүүлж эхэлсэн.

Хэрхэн Уур амьсгалын ногоон сангийн санхүүжилттэй төсөл, хөтөлбөртэй холбоотой санал гомдол гаргах вэ?

Та санал, гомдлоо дараах шугамаар мэдүүлж болно.

Цахим өргөдөл бөглөх:

Та ЭНД дарж санал, гомдлын цахим өргөдөл бөглөнө үү.

Имейл:

[email protected] хаягаар имейл ирүүлж болно.

Захидал:

Та мөн ХХБанкны дараах хаягаар санал, гомдлоо захидал хэлбэрээр ирүүлж болно:

Сүхбаатар дүүргийн 1-р хороо, Энхтайваны өргөн чөлөө 19, Худалдаа, Хөгжлийн Банкны төв байр

Таны ирүүлсэн төсөл, хөтөлбөртэй холбоотой санал, гомдол нь дараах мэдээллийг агуулсан байх шаардлагатай.

- Гомдол гаргагчийн нэр, утас, имейл хаяг, гэрийн хаяг, гарын үсэг

- Гомдол гаргаж буй төсөл, хөтөлбөрийн нэр

- Төсөл, хөтөлбөрөөс үүдэн бий болсон эсвэл бий болох магадлалтай гэж үзэж буй сөрөг нөлөөлөл, үр дагавар

- Төсөл хэрэгжүүлэгчидтэй холбогдсон эсэх

- Гомдол гаргагчийн зүгээс санал болгож буй шийдэл, хүлээж буй үр дүн

- Гомдол гаргагч өөрийн мэдээллийг нууцлах хүсэлтэй байгаа эсэх